Inicio > > Actualidade
Compartir

Compártao :

A Xunta levará nos próximos días a súa campaña informativa sobre a nova tarifa eléctrica a distintos concellos da provincia da Coruña

Actualizado o: 11 outubro 2021 14:36
Fonte de información: Xunta de Galicia

Abegondo acollerá este mércores esta xornada de apoio e asesoramento á cidadanía, que chegará o xoves a Boiro e o próximo 21 de outubro a Boqueixón

O Instituto Galego do Consumo e da Competencia (IGCC) estableceu convenios de colaboración con asociacións de consumidores e usuarios para habilitar puntos de información gratuíta nas súas instalacións, feito que tamén coordinou coas 90 oficinas municipais de información ao consumidor (Omics)

Santiago de Compostela, 11 de outubro de 2021.- A Xunta de Galicia, a través do Instituto Galego do Consumo e da Competencia (IGCC), continúa este mes de outubro coa súa campaña informativa, de apoio e asesoramento á cidadanía galega sobre a nova tarifa eléctrica implantada polo Goberno.
Así, o próximo mércores 13 a iniciativa chegará a Abegondo, desprazándose ao día seguinte –xoves 14– ao concello de Boiro. O 21 de outubro tamén está previsto que se leve a cabo un taller aberto á cidadanía en Boqueixón.
Ademais de achegar ás persoas consumidoras esta información de xeito presencial e online –a través da aula virtual–, o IGCC, dependente da Vicepresidencia segunda e Consellería de Economía, Empresa e Innovación, elaborou folletos informativos con consellos e orientacións para aforrar na factura da luz, tendo en conta os tres períodos horarios que contempla a nova tarifa –val, chairo e punta– e creou contidos dixitais na súa web.
O Goberno galego estableceu tamén convenios de colaboración con asociacións de consumidores e usuarios como Brétema, Euroconsumo, Ucgal, Fuciga e Adicae para que estas habilitasen puntos de información gratuíta nas súas instalacións, feito que tamén coordinou coas 90 oficinas municipais de información ao consumidor (Omics) existentes en Galicia. A este respecto, a Xunta abriu en xullo de 2021 unha liña de axudas dirixida ás asociacións e federacións de consumidores que realicen actuacións divulgativas, de asesoramento e información na nova factura da luz.
Dado que a subministración de electricidade é unha necesidade básica das persoas, a Xunta tamén presta especial atención aos colectivos máis vulnerables ou en risco de exclusión social. Así, o Instituto Galego do Consumo e da Competencia levou a cabo actuacións informativas en colaboración coa Federación Galega de Asociacións Universitarias Seniors (Fegaus) –para axudar a persoas de idade avanzada– e con Cáritas –a través da formación do seu persoal na materia–.
Cómpre lembrar que a Xunta de Galicia ampliou este ano ata os 2,1M€ as axudas do bono social eléctrico galego para garantir o servizo nos fogares con máis dificultades. No que vai de ano, os apoios xa concedidos están permitindo axudar a máis de 4500 familias.
O IGCC, ademais das súas oficinas repartidas polas sete grandes cidades de Galicia ás cales se pode asistir mediante o sistema de cita previa, conta cun servizo telefónico gratuíto a través do número 900 23 11 23, que funciona de 9 a 14 horas de luns a venres. Os consumidores tamén poden enviar as súas dúbidas por correo electrónico ou a través dun formulario que atoparán na web do organismo.