Compartir

Compártao :

A Xunta licita en preto de 300.000 euros obras para incrementar a eficiencia enerxética no edificio da Audiencia Provincial de Lugo

Actualizado o: 07 marzo 2018 18:30
Fonte de información: Xunta de Galicia

O delegado territorial, José Manuel Balseiro, explicou que se actuará sobre a iluminación, no mellor illamento dos ocos da fachada e nas carpinterías

Lugo, 7 de marzo de 2018.- O Goberno galego licita hoxe no Diario Oficial de Galicia as obras de mellora da eficiencia enerxética no edificio da Audiencia Provincial de Lugo, cun orzamento de licitación de 298.970 euros.

O delegado territorial da Xunta en Lugo, José Manuel Balseiro, explicou que se actuará sobre a iluminación, na mellora do illamento dos ocos da fachada e nas carpinterías. “Con este novo contrato -asegurou- o Goberno galego fai patente a súa aposta pola mellora das instalacións xudiciais e tamén o seu compromiso co medio ambiente e o desenvolvemento sostible”.

Neste sentido, Balseiro engadiu que a Xunta “está a predicar co exemplo introducindo medidas de aforro enerxético en edificios públicos da súa titularidade. Xa o estamos vendo en distintos centros educativos e agora demóstrase de novo neste proxecto”.

Practicamente o 85 por cento do orzamento está destinado ás actuacións nos peches verticais, para a mellora dos ocos da fachada, tanto á reparación da carpintería exterior de madeira como á instalación de nova carpintería de aluminio e á substitución do acristalamento existente, formado por luna de vidro simple, por outro de dobre acristalamento de baixa emisividade térmica.

Tamén se procederá á fixación de premarcos metálicos e verteaugas de chapa de aluminio, e instalaranse unha vintena de contraventás pregables de catro follas.

Polo que respecta á mellora da eficiencia enerxética da iluminación, retiraranse para a súa reciclaxe un total de 956 tubos fluorescentes e lámpadas e substitúense por 953 tubos e luminarias tipo LED.

A licitación pode consultarse no seguinte enlace do DOG:
https://www.xunta.gal/dog/Publicados/2018/20180307/AnuncioG0244-220218-0001_gl.html